|
|
|||||||
| آخر 10 مشاركات |
 |
|
|
أدوات الموضوع | انواع عرض الموضوع |
|
#1
02-02-2010, 06:15 AM
|
||||
|
||||
جولييت بدر .... دُمتِ مبدعة ومتألقة !
هي جولييت بدر ... شاعرة و اديبة سورية , تكتب الشعر المحكي الشعبي و الفصيح الموزون, هي الشاعرة المزروعة بدورب القمر , تنثر بسخاء مفرداتها و صورها التي تعبق بنسمات جبال الساحل السوري , عاشقة الطبيعة و القرية و البحر ....
أسرتني قصائدها من اول نغم , كانت قصدية باخوس أول اللقاء, بحثت عن كاتبتها في العالم الافتراضي لتصبح فيما بعد صديقة عزيزة و غالية .... *صديقتي جولييت ... لكِ مني كمشة ياسمين بحجم محبتي و تقديري  باخوس بودلير قايل للبشر: ضلوا اسكروا حلو ِ السّكْرْ والسِكر مش يَعني خمرْ يمكن قصيدة حبْ تسمعها... شي بيت رائع م ِ الشعْرْ شي سَهْرَة حلياني بطَرَبْ وتغريد بلبل للفَجرْ ضمّة وشمّة للحبيب ال ريحتو أزكى عطرْ شي غمرة بزنود العشق لمسة وضمّة عَ الخصرْ أوبَوْسة تكيت عالخدود والا شي غفوة عالصدرْ يمكن شي همسة وَلَه بيقولا محبوب العمرْ بس السِكرْ بيضل أحلى من السحرْ بيمتعَكْ..بيريّحَكْ وبتنتشي بحضن السحاب نشوة متل موج البحرْ بتربَحْ معا غفلة زمان وتعتق شعورك م ِ الأسرْ هيدا السِكر ْبأيّا شي بدّك بيصير وبأيّا أمرْ باخوس زرع كرمة عنب كبّرها جوّا حقولنا بارك عصيرا وقال: انو العنب لون الفرح وغناني ملفوفة بمرح تنسّينا بعض همومنا وحدَك ياباخوس شو تعبت !!! وزحت الضنا من دروبنا انتَ ياباخوس الزرعِتْ لون الفرح بعيونا رقصتنا سهّرتنا علمتنا نعيش الحياة ندوق السعادة والهنا ولا لحظة منو تفوتنا باخوس انت اللي مش رح تنتسى وانت العمر من دون أسى وأحلى الحلا ببيوتنا -------------------------------- شهقة ورد ..قصيدة لقريتي جيتك أنا ياحلوة الحلوات يللي القمر سكران بوصالِك جيتك أنا ت قطف النهدات وشهقة وردهن ليل ع خيالك إنت النهد من جسم أرض الرب الكوّن جمالِك نوّر تلالِك نهد الطبيعة وكرزتو الحمرا قناديل نور تشعشع بخالك ضيعتي .. زيتونة التاريخ سِفر الحقيقة بيذكر فعالك السَيْكون والشفشاف والطيّون وريحة الجنة بعرزالك الاسكندر الأكبر غزا العالم وعرّج ع ديرتنا تا يقعد قبالِك بولس إجا لمّن سمع فيك روما تركها وهاااااااام .. كرمالِك روما .. شو روما ؟ شو الكوليزيوم لو يلمحو نورك بيقولو : نيالِك انت ال صنعت المجد بوجودك نجمة ونجمة ينسجوا شالِك جن الزمان بعشقك وغنّى منجيرتو حنت تَ يحلالِك قالوا : العجايب سبعة هالأيام انت العجيبة وما حدا طالِك عم أختصر حب الوطن فيك انت الوطن .. خيرو من سلالِك ---------------------------------- كنسل لا تقول بهواك ِ وتقنعني وقلبك بغيري معلق وناطر بحبك أنا وقلبي معذبني هايم بكذبة ما لها آخر طيف ومرق ع بالك يغني علِقتْ بشباكو وهِمتْ ياشاطر نكنو الهوى بدّو يمرمرني رح كنسلو من الذهن والخاطر وافتح لحالي الوورد يفهمني واكتب على الكيبورد هالساحر شوية حكي وأشعار تنفعني والميموري تسيّفلي وتساهر مسنجري ماعاد يلزمني بعدك حبيبي فارغ وفاتر ---------------------------------- بالبسملة بالبسملة : صبّح عليّ وقال شو هالشعر ياريحة الدرّاق ياطعمة الدراق قطف الصبح شهقة ألق ..تنهيدة العشّاق شجرة عريشة معربشة ع الحور والحور سايق عالسما وأكتر ما بتلفتو حركة وما تمختر متل العمر ما بينتظم بالدور بالبسملة : كمّل حديثو قال : .. خليك نبع وتدلقي الأشعار مَيّة نقيّة تنبت الأزهار تسقي اليمامة تورق الأشجار لا تنحني للريح مهما تعركك شعرك صخر ما بينتبه للنار زهر الطبيعة يعطر الأنفاس كلو كرم ..ما بينتظر آجار والبلبل يرندح حلا ع الناس فوق الغصن والا بصحن الدّار متل البلابل والزهور العاطرة خليكي دوم ترندحي هالخاطرة وزيدي غيوم الحب تَ تشتي الدني عطف ومحبة وسلم كل نهار ----------------------------------------- مشوار مشوار جينا عالدني ومنعود نزرع وَله نحصد عشق ووعود نقطف وفا من عيون هالنحلات بالكرم نتعلم شو معنى الجود نسمع صلا من تكتكة حسون نشرب نبيد الرب من عنقود هالتينة ال وقفت عباب الدار تعزم ع كل الناس : فوت و خود والخوخ والرمّان والدراق شو بيفرحوا لما الغصن بيجود نحنا البشر زيتاتنا شحوا فينا العطف. . وفينا الكره موجود مشوار نقضي هالعمر مشوار بعطر المحبة تلتغي الحدود نعيش العمر نسمات شرقية حلوة طرية من عبق الورود ننسى الجفا هالمتل شتوية كلا عواصف هايجة ورعود -------------------------------------- تمــّوزي أنتَ و عشتاري إنــّي أخفيتُ بأشعــــاري * * * * حبــّاً قد أوقدَ بـــي ناري وفرشتُ الخَيمةََ َبالعطــر ِ * * * * فتعالَ وداعـــــبْ أوتـاري ما بالكَ تخشى الإبحـــــارَ * * * * والموجُ صديقـُكَ بحّـاري المركبُ والبحر ُحبيبــــي * * * * قدْ شاقـَهم ُ البرق ُالسّاري هيّــأتُ-الرّوضُ لكَ -القلبَ * * * * فقطفتَ حدائقَ أفكــــاري أنتَ المؤتــَمنُ على ثغري * * * * وبفيكَ أقابـــــــــلُ سمّاري فارشِفْ ما شئتَ بلا وجـل ٍ * * * * عسلاً بجـِـرار ِ الفخـّـــــار ِ الـرّوحُ تـُناديكَ بشـــــــــوق ٍ * * * * يا نجمــاً سطــّر أخـباري القلبُ ديارُكَ فلتبــــــــــــقَ * * * * وشغافي عنـدَكَ أســواري في بحركَ أُبحـرُُيا حبـــّـــي * * * * و أجدّفُ عـــكسَ التـّـــيار ِ إنـّي أسكنتـُكَ شريــــــــاني * * * * ملـّكتك َ أصدافَ محـاري يا هيكل َ حبــّي يا سِفــْــراً * * * * يا دوحَ الفكــر ِلأقمــاري جمّـعْتَ سجايا لا تــُحصى * * * * من علــم ٍ..أدب ٍ مدرار ِ زادي، خـُبزي، خمري، قمري * * * * تمّوزي أنتَ وعشتاري وخليلي أنتَ فأسكِرْنــــــي * * * * باللـّثم ِيدغدغ ُ نــــــوّاري وطني، قافيتي و مـــلاذي * * * * وبدونكَ لم ْ تك ُ أشعاري ------------------------------------------ عتمة حب وينو الحبْ ؟؟ العمر ال قضّيتو سهرانة ،، انطر شي همسة من قلب شي نظرة ،، شي لفتة حلوة ،، تحس بقلبي ال ناطر وعدْ ناطر هجمة متل الرعدْ تقللي بين الغيم ال مارق شفت اللهفة !! رغم البعدْ !! بَيْعَد.. متل الصرخة بوادي مات ،، وخلصت الزوادة كان قبالي يكتب عهدْ ويبصم بالعشرة عالنسمة ،، يرسم اسمو فوق النغمة ويحلف لي بليالي السعدْ رح يقطف لي نجوم الكلمة يلملمها ويعملها عقدْ يشنشل قلبي بمشتل زهرْ وجوقة حوريّات البحرْ وفراشات الحلمْ الأخضرْ تغمرني بوراق الوردْ ويْنو الحب ؟؟ سرسب عمرْ ،، بقلب الدهرْ ، الحب ال صاير متل الصخر ، كان يزهّرْ... كان يعطّرْ .. كان يموّج كنّو البحرْ تعرّى.. بليلة كلا قهرْ .. خنقيتو الغولة المجهولة ورفعت سيفا وهدرت هَدْرْ حتى المارد جوّا القمقم قهريتو وحوّلتو شرْ وَيْنو الحب ؟؟ --------------------------------------- عَمْ إنْطْرَكْ عَمْ إنْطْرَكْ عِنْدي إِلَكْ شي كْتير خصْر الْوُرُود مْزَنَّرَة بِحَرير عَمْ إنْطْرَكْ تا خَبّرَكْ شو صار بَيْن الْفَراشِة وْبَين الِشْحارير رَحْ إنْطْرَكْ تَ نْغِلّ بالغابات تِمْسُكْ بِإيدي وْبالْفَلا مِنْطيـــر عَمْ إنْطْرَكْ لَنْغُوص بالمَوجات نِقْطُفْ مَحار الشَّوق خَلْف الشِّير وْنِطْلَع عَ جِنْح الْمَوج نِتْمَشَّى نِسْمَع حْكـايا الْجِنّ هَالسِّكِّير مَرْجُوحْة الْهَمْسِة عَمْ تِنْتِظِرْ رَدَّكْ طــال البُعــاد وْما إلُو تفْسير عَمْ إنْطْرَكْ حتى الزّمان يْدُوخ وْحتى الفَضا مايِقْبل عْصافيـر شو قَولْتَكْ يللّي مْلكِتْ قلبي بْحَمْلِة حَنـان عْلَيكْ فيها بْغِيْــر هَدِّم حْصُون الصّدّ وِالْهِجْران وْنِرْجَع سَوا لَشَوْقْنـا نْواطير .. --------------------------------- يا عُمِر وَقِّفْ هَون دَقّ الْعُمُر بابي وْأنا وَحْدي عمْ راجِع الذِّكْرى عَ المْخدّة ضَوَّيتْلُو شَمْعَة أنا وِالْقَلْب وِاسْتَعْرَضِتْ خُطْوات كِلّ الدّرب دَمْعِة حِزِنْ كَرْجِتْ عَلى خدّي قَللّي: شُبَك؟ وَيْن الْفَرحْ .. لَوْن الْقَزحْ كنتِ ما تِتْهَدِّي لَيْكي الشّمس لَيْكي القَمر صَرْلُنْ دَهِر قَضُّوا عُمِر وَرْدي غَفْلِةْ زَمَان ارْتاحْ .. وِسْنينو بِتْعَدِّي وْمِتْلِ اللّي بَدِّي قولْ وْمِتْل اللّي ما بَدِّي دَخْلَكْ بَقَى ياعُمْر وَقَّفْ هَون اتْرِكْني مع النَّسْمِة مع الْبَسْمِة إنْشُرْ عِطِرْ.. كَمْشِةْ شِعِر خلِّي الْحَلا عِنْدي يِمْكِنْ خَجَلْ مِنْ لَهِفْتِي وْوَجْدي مِنْ حَرِكْتي مِنْ دَمِعْتي وْرَدِّي سَرَّبْ .. مِشِي قَللِّي: اقْطِفي نْجُوم الْحَرِفْ لا تْوَقّفِي وِتْمَرْجَحِتْ بين النُّجُومْ إقْطُف سِحِرْ .. زُور الْبَدِرْ إسْرُقْ ضِياه وإكْتِفِي خَلاّني إتْمَرْجَحْ صِبَا إسْهَر مع الكِلْماتْ بُوسِا .. وْلَيْعِبا إحْلَم مع فْراشات حِلْوة عاشِقَة تْطَرِّزْ حِلِمْ تِرْفُضْ عَتِمْ عَ النُّور تِتْرَقْوَص وَلا تْهَدِّي إحْمي خْدُود الْوَرِد مِ التِّجْريحْ وْضَلّ حَدُّو تَ يْزيح الرِّيح وْضُمّ حِفْنِة مْنِ الْحَلا بْيَدِّي. ------------------------------------ معــــقول معقول ينسى البلبل التغريد ؟ معقول ينسى البرعم التوريد ؟ والموج يتخاصم مع الشطآن والشمس تهجر جوّنا لبعيد ؟ معقول تتسحّب على مهلك وتهجر حنان القلب ل رتحلك معقول تبعد عن دفا قلبي بس مش معقول اسمحلك تشرين جانا مقطب جبينو معبّى جعبتو غيوم لتعينو برد وشتي مبكّر على العالم خلّى الدني تتذكر سنينو قلبك متل تشرين شو تغيّر صار الحنين بداخلو محيّر كان العشق متغلغل بعبّو وكان بحنين الشوق يتسيّر ----------------------------------------- حضوركَ حضورك أبهى من الياسمين من الشوق حين يضجّ الحنين من الوجد يزهو طليق الرؤى من الدفء يمحو صقيع السنين ومن لهفة فيّ من قبلة تذوب لتغفو فوق الجبين أحبك فوق احتمال الهوى أريدك حارس عمري الأمين أتذكر همس السنا ياحبيبي وبوح البنفسج للعابرين ورقص الفراش وهمس الخزامى لقلب كسير ونبض سجين وتصحو رؤى الوجد في زهرة تنامت لتبلغ قلبي الحزين فكم رمت كبحاً لوهج الهوى ومالي على مهجتي من معين وها أنت تبغي مزيداً مزيدا من العشق و الوجد رغم الأنين ------------------------------- الخيانة إن ّ الخيانة والرياءْ داء وليس كأيِّ داءْ لا تنفع الرقيا له أبداً ولا حتى الدواءْ فتريّثي ياحلوتي وتفهّمي مرّ الشقاء بعض الرجال مزيّف حتى ولو أبدى الوفاء مثل الفراش بلهفة للزهر يرنو باشتهاءْ لا تُفجعي بريائه وتمسّكي وتمسكي بالكبرياء -------------------------------------
__________________
ينسى الغفا عيوني إذا بنساكون
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل] 
|
|
#2
02-02-2010, 06:51 PM
|
||||
|
||||
رد: جولييت بدر .... دُمتِ مبدعة ومتألقة !
صديقتي سهى اختياراتك دائما موفقة اي هيك وينك من زمان لاتروحي لعند فريد خليكي معنا
__________________
المخلصون نادرون كالأحجار الكريمة معادنهم تشع بالمحبة وإن قصرنا في حقهم لا يتغيرون بل يزدادون لمعانا
|
|
#4
02-03-2010, 04:23 PM
|
||||
|
||||
رد: جولييت بدر .... دُمتِ مبدعة ومتألقة !
أهلا بصديقي العزيز اوبن مايند .... نور المنتدى
جولييت رائعة فعلاً و قريباً ستنضم الينا و نحن بانتظارها تحياتي اوبن مايند
__________________
ينسى الغفا عيوني إذا بنساكون
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
|
|
| أدوات الموضوع | |
| انواع عرض الموضوع | |
|
|
العرض العادي
